اسلام آباد اور راولپنڈی میں بارش کی جھڑی، گرمی سے کمی
ہفتہ کے روز اسلام آباد اور راولپنڈی میں تیز ہواؤں کے ساتھ موسلا دھار بارش ہوئی، جس سے حالیہ شدید گرمی کی لہر سے شہریوں کو خاطر خواہ ریلیف ملا۔
وفاقی دارالحکومت کے کئی علاقوں، بشمول آبپارہ، میں ژالہ باری بھی ہوئی، جہاں بارش کا پانی گھروں میں داخل ہونے سے شہریوں کو مشکلات کا سامنا کرنا پڑا۔ بارش سے قبل شہر پر گھنے بادل چھائے ہوئے تھے، جن کے بعد تیز ہواؤں نے درجہ حرارت میں نمایاں کمی کر دی۔
محکمہ موسمیات کے مطابق راولپنڈی کے شمس آباد میں 29 ملی میٹر، پی ایم ڈی میں 30 ملی میٹر اور گولڑہ میں 10 ملی میٹر بارش ریکارڈ کی گئی۔ واٹر اینڈ سینیٹیشن ایجنسی (واسا) کے حکام کے مطابق نالہ لئی میں پانی کا بہاؤ معمول کے مطابق رہا۔ نشیبی علاقوں میں عملہ مشینری کے ساتھ الرٹ رہا، جب کہ اسلام آباد میں بعض مقامات پر سڑکوں پر پانی جمع ہونے لگا، جس پر ٹریفک پولیس نے شہریوں کی مدد کی۔
ادھر نیلم ویلی، آزاد کشمیر میں شدید بارش اور تیز ہواؤں کے باعث بریان سیری کے مقام پر لینڈ سلائیڈنگ ہوئی، جس سے نیلم ہائی وے بند ہوگئی۔ ایبٹ آباد کے مختلف علاقوں میں بھی ہلکی بارش کی اطلاعات موصول ہوئیں۔
پشاور میں آسمان جزوی طور پر ابر آلود رہا اور درجہ حرارت 35 ڈگری سینٹی گریڈ ریکارڈ کیا گیا۔ محکمہ موسمیات نے اگلے 24 گھنٹوں کے دوران مزید بارش کی پیش گوئی کرتے ہوئے بتایا کہ درجہ حرارت 39 ڈگری تک پہنچ سکتا ہے۔
خیبرپختونخوا کے میدانی اور بالائی علاقوں میں شام کے وقت گرج چمک کے ساتھ بارش کا امکان ہے۔
یاد رہے کہ ایک ماہ قبل اسلام آباد اور خیبرپختونخوا کے مختلف علاقوں میں شدید ژالہ باری نے تباہی مچائی تھی۔ تقریباً 35 منٹ جاری رہنے والی اس طوفانی ژالہ باری میں بڑے سائز کے اولوں کے ساتھ ساتھ آندھی نے بھی شدید نقصان پہنچایا۔
اس طوفان سے گاڑیوں کے شیشے ٹوٹ گئے، سولر پینلز کو نقصان پہنچا اور درختوں کی شاخیں سڑکوں پر بکھر گئیں۔ اسلام آباد کے علاقے ترنول میں آندھی کی شدت سے کئی درخت جڑ سے اکھڑ گئے، جس کے نتیجے میں ٹریفک کی روانی متاثر ہوئی اور اہم شاہراہیں بند ہو گئیں۔
