لاہور (مسائل نیوز) پاکستان مسلم لیگ ن کی نائب صدر مریم نواز نے کہا ہے کہ عمران خان پاکستان کے سب سے بڑے فتنے کا نام ہے ، اس فتنے کو جتنی جلدی کرش کرلیں اور اصل مقام پر پہنچا دیں، اتنا ہی ملک کا بھلا ہوگا ۔ تفصیلات کے مطابق گورنر ہاؤس میں میڈیا سے گفتگو کرتے ہوئے انہوں نے کہا کہ ان لوگوں نے سیاسی دشمنی میں مسجد نبوی ﷺ کی بےحرمتی کی، مسجد نبوی میں افسوسناک واقعہ منصوبہ بندی کے ساتھ کیا گیا ، واقعے پر سعودی عرب میں گرفتاریاں بھی کی گئی ہیں۔
مریم نواز نے کہا کہ جتنے بڑے چیلنجز ہیں اتنا ہی بڑا ارادہ ہے، ہم پنجاب اور پاکستان کے عوام کو ریلیف دینا چاہتے ہیں ۔ گزشتہ روز مسلم لیگ ن کی نائب صدر مریم نواز کا کہنا تھا کہ عمران خان اور اسکے ساتھیوں نے جس طرح مذہب کو سیاست کے لیے استعمال کیا ، ان کے چہرے سے کل قدرت نے اس نقاب کو اتار پھینکا ، نقاب اترنے کے بعد ان کا جو مکروہ چہرہ سامنے آیا ہے ، وہی ان کی سب سے بڑی سزا ہے۔
- Advertisement -
اپنے بیان میں مریم نواز نے کہا کہ کل حرمِ پاک مدینہ منوّرہ میں تحریک انصاف کی قیادت کی سرپرستی میں ہونے والی بےادبی سے نبی صلی اللّہ علیہ وسلم سے محبت کرنے والے تڑپ کر رہ گئے ، مجھے غصے میں بھرے سینکڑوں پیغامات موصول ہوئے کہ حکومت ایکشن کیوں نہیں لے رہی ، حکومت کا ایکشن سیاسی انتقام تصور ہو گا اور یہ معاملہ سیاسی نہیں ہے۔
ان کا کہنا تھا کہ مسجدِ نبوی صلی اللّہ علیہ وسلم کے احاطے میں مریم اورنگزیب کو گالی دی گئی ، اس سے بڑی بدبختی کیا ہو سکتی ہے کہ مغفرت کی راتوں میں دنیا کی پاک ترین جگہ پر پاک ترین ہستی کے در پر رحمتیں اور مغفرت سمیٹنے کی بجائے انسان دونوں جہانوں کی ذلتیں سمیٹ آئے؟۔