ممبئی(مسائل نیوز)بھارت کی اپوزیشن جماعت کانگریس کے رہنما و سابق مرکزی وزیر ششی تھرور نے منشیات کیس میں شاہ رخ خان کے بیٹے آرین خان کی گرفتاری پر اداکار کا مذاق اڑانے والوں کی سخت تنقید کرتے ہوئے انہیں اس تکلیف میں لطف لینے والا قرار دیا ہے۔ بھارتی ذرائع ابلاغ کے مطابق ششی تھرور نے کہاکہ ایسے معاملے میں کسی نوجوان کو بدنام کرنے کے بجائے اس کے ساتھ ہمدردی رکھی جانی چاہئے۔انہوں نے ٹویٹر پر آج ایک تبصرہ میں کہا کہ میں پارٹی میں لی جانے والی ڈرگز کا شوقین نہیں ہوں اور نہ ہی میں نے کبھی انہیں استعمال کیا، لیکن مجھے ایسے لوگوں سے نفرت ہوتی ہے جو شاہ رخ خان کے بیٹے کی گرفتاری پر ہاتھ دھوکر اس کے پیچھے پڑ گئے ہیں اور نفرت انگیز طریقہ سے تکلیف سے لطف لے رہے ہیں۔
